Analisti Andi Bushati, ka përcjellë një koment në rrjetin e tij social, lidhur me lajmin për ngritjen e akt-akuzës së Gjykatës Speciale për presidentin Hashim Thaçi dhe kryetarin e PDK-së, Kadri Veseli. Ai thotë se asgjë nuk ka qenë krejt rastësore, por me prapavijë politike. Në një kohë kur ishte caktuar edhe data e takimit, lëvizja e radhës duket se dha provat se pas kësaj ka një skenar të frikshëm.
Publikimi nga ana e Hagës për akuzat e ngritura, ka ngjallur mjaft dyshime. Sinjalet janë se e gjitha kjo ka ta bëjë me tryezën e bisedimeve në Shtëpinë e Bardhë mes Kosovës dhe Serbisë. Më 27 qershor, Thaçi e Vuçiç do uleshin bashkë, por kjo nuk do të ndodhë.
“Qe vendimi i Hages kunder Thaçit, tre dite para takimit te Uashingtonit vjen era politike, kjo eshte nje e vertete uleritese. Por, qe llogarite e tij per te shpetuar nga specialia, duke u hequr si Trampist dhe duke u tallur me BE dolen te gabuara edhe kjo nuk ka vend per koment”, ka shkruar në Facebook analisti Andi Bushati.
Zyra e Prokurorit të Specializuar në Hagë, ka njoftuar se ka ngritur akt-akuza ndaj presidentit Hashim Thaçi, kreut të PDK, Kadri Veseli dhe disa zyrtarëve të tjerë, për krime lufte.
Në njoftimin e bërë publik nga Zyra e Prokurorit Special, bëhet e qartë se akt-akuzat përmbajnë dyshim për përgjegjësi penale për rreth 100 vrasje. Ata janë të dyshuar për krime kundër njerëzimit dhe krime lufte ndër të cilat, vrasje të paligjshme, zhdukje e detyruar e personave, përndjekje dhe tortura.
