Ministri i Brendshëm, Sandër Lleshaj, ka hedhur poshtë në mënyrë kategorike lajmin se ka dhënë dorëheqjen. Deklaratën e ka dhënë nga Elbasani, duke konfirmuar se ai nuk do të largohet nga qeveria. Ministri u shpreh se është akoma në detyrë, dhe se ka një mision për të kryer.
“Nuk ka qenë asnjë deklaratë e kundërt. Kam dhënë përgjigje për pyetje të tilla. S’kam dhënë dorëheqjen, jam në detyrë. Nuk dorëhiqem, eci përpara, sepse kam një mision për të kryer, kam një përgjegjësi”, u shpreh ministri.
I shoqëruar nga kreu i grupit parlamentar të PS, Taulant Balla, Lleshaj shtoi se policia po punon me profesionalizëm.
“Jo, s’kam thënë që ka dështuar policia. Mundohuni të kuptoni drejt. Policia jo vetëm që s’ka dështuar, por po kryen detyrën me profesionalizëm dhe sukses në gjithë vendin. Sigurisht kjo nuk do të thotë që ngjarje nuk mund të ndodhin, se ndryshe nuk do kishim as polici”, tha Lleshaj.
