Ish-Prokurori i Përgjithshëm, Adriatik Llalla, dyshohet se është larguar nga Shqipëria për t’i shpëtuar arrestimit nga policia. Kujtojmë se një ditë më parë, Gjykata e Apelit të Posaçëm la në fuqi vendimin për dënimin me dy vjet burg të ish-kryeprokurorit Llalla.
Ka dyshime se ai është larguar nga vendi drejt Turqisë, dhe se një tjetër destinacion i vendndodhjes së tij është Italia. Dyshimet shtohen pasi ai nuk ishte dje i pranishëm në gjyq gjatë marrjes së vendimit nga Apeli i Gjykatës së Posaçme Kundër Krimit dhe Korrupsionit.
Me gjasë është arratisur nga vendi për t’i shpëtuar arrestimit. Ka dyshime se ish-Prokurori i Përgjithshëm është arratisur nga vendi për t’i shpëtuar burgut, dhe se po tenton të përfitojë azil politik.
Sipas ligjit, nëse Policia e Shtetit nuk arrin ta lokalizojë ish-prokurorin Llalla, ai do të shpallet në kërkim kombëtar dhe ndërkombëtar, pasi është dënuar nga Apeli i GJKKO me 2 vite burg, vendim ky që është i formës së prerë.
Referuar dënimit të ish-kryeprokurorit Adriatik Llalla, një reagim i shpejtë është përcjellë nga ambasadorja e Shteteve të Bashkuara të Amerikës në Tiranë, Yuri Kim.
Diplomatja amerikane thotë se është mirë të shihet drejtësia e vendosur kundër zyrtarëve të korruptuar.
“Është mirë të shihet drejtësia e vënë kundër zyrtarëve të korruptuar. Prokurorët duhet të vazhdojnë të ndërmarrin veprime kundër zyrtarëve, pa marrë parasysh sa të lartë apo të fuqishëm, të cilët keqpërdorin pozitën e tyre për t’u pasuruar. Askush nuk është mbi ligjin”, shkruan Kim.
