Miratohet lista me 500 familje të tjera të cilat do të dëmshpërblehen, si pasojë e dëmeve që kanë marrë banesat nga tërmeti i 21 shtatorit.
Këshilli Bashkiak i Tiranës e miratoi listën në mbledhjen e mëngjesit të sotëm, duke çuar numrin e familjeve deri më tani në 1058. Kreu i Bashkisë, Erion Veliaj, deklaroi se këto dëmshpërblime do të bëhen me pagesë cash.
“Kanë punuar non-stop, që për dëmshpërblimet në pagesë cash, siç bëmë 2 herë, pra 1 herë me 51 dhe 1 herë me 507 dëmshpërblime, edhe sot kemi 500 dëmshpërblime të tjera. Pas verifikimit të dosjeve, Drejtoria e Emergjencave Civile i ka përcjellë për vlerësim në Këshillin e Qarkut Tiranë, 500 dosje për dëmshpërblimin e familjeve që janë prekur nga tërmeti i datës 21 shtator 2019. Për shkak të situatës emergjente të krijuar, është punuar me orar të zgjatur dhe për një pjesë të praktikave ka përfunduar edhe procesi i vlerësimit nga grupi i ekspertëve në Këshillin e Qarkut, të cilat janë përcjellë nga ky institucion në Drejtorinë e Emergjencave Civile, Bashkia Tiranë”, tha ai.
Ndërkohë që bëhet me dije se në mbledhjet e ardhshme, Këshilli Bashkiak do të miratojë edhe dosjet e tjera.
