Kreu i Partisë Demokratike Lulzim Basha pas mbledhjes së grupit parlamentar të PD-së, i kërkoi qytetarëve që ti kërkojnë llogari drejtësisë.
Ndërsa për masën e arrestit të kryebashkiakut të Lezhës, Fran Frrokaj, ai tha se drejtësia duhet të jetë e barabartë për të gjithë, duke sjellë në vëmendje rastin e kryebashkiakur të Kavajës, Elvis Roshi, i cili nuk është arrestuar edhe pse ndaj tij pati një lum akuzash, nga ana e opozitës.
“Unë mund t’iu them këtë gjë: Nuk kam marrë kurrë për sipër të gjykoj apo të jap vlerësime për vendimet e gjyqësorit. Por, mund t’iu them që drejtësi është ajo që funksionon në mënyrë të barabartë në raste të barabarta. Pse nuk është arrestuar Elvis Roshi? Pse nuk është ndjekur i njëjti standard për të njëjtat akuza për dhjetëra pushtetarë socialistë. Erjon Veliaj po tjetërson pronë publike në qendër të Tiranës, tek Teatri Kombëtar bashkë me Edi Ramën. Po tjetërsohet pronë në Fier, për të favorizuar inceneratorët e Arben Ahmetajt. Pse nuk vepron drejtësia në këto raste?
Ky pra është shqetësimi, ky është qëndrimi dhe kjo është kërkesa që kemi dhe kam ndaj qytetarëve: Mos harroni, mos heshtni. Kërkoni llogari drejtësisë të bëjë punën e saj”, tha Basha.
