Arbër Çekaj dhe Fatmir Pjetri, tentuan dje të arratiseshin nga burgu 313, por përpjekja dështoi. Ata kishin prerë çarçafët dhe i kishin gërshetuar, por më kot, pasi u kapën.
Çarçafë të bërë gërshetë, dhe një çengel hekuri. Këto kanë qenë mjetet me të cilat Arbër Çekaj dhe Fatmir Pjetri tentuan që të arratiseshin nga burgu 313.
Të dy janë vënë në izolim, sepse është ngritur ndaj tyre vepra e “largimit nga vendi i vuajtjes së dënimit” dhe “kundërshtimi i policisë”. Arbër Çekaj dhe Fatmir Pjetri (një prej anëtarëve të bandës së Babagjushëve) organizuan në bashkëpunim me njëri-tjetrin, tentativën e arratisjes. Ata shfrytëzuan situatën e stisur nga një i paraburgosur tjetër, i cili ka tërhequr vëmendjen e forcave të sigurisë, duke prerë damarët e dorës.
Pse kjo neglizhencë nga ana e policisë?
Shërbimi i kontrollit të brendshëm të burgjeve në varësi të Ministrisë së Drejtësisë, po verifikon veprimet e efektivëve të policisë, të cilët ishin në detyrë gjatë ditës së diel. Ka dyshime se ata e kanë neglizhuar detyrën, pavarësisht se plani i arratisjes dështoi.
Skema e arratisjes
Është konfirmuar e gjithë skema e arratisjes, se dy të burgosurit ishin në tarracën e burgut 313, e cila është përshtatur si vend ajrimi, pra kati i fundit i 313, përveç fushës së sportit që është në katin përdhes është përshtatur për ajrim të të burgosurve.
Mbetet e paqartë se si të burgosurit që ndodheshin në ajrim së bashku me të tjerë, nuk janë kontrolluar dhe se si e kanë transportuar çarçafin rreth 20 metra të gërshetuar apo nëse herë pas here, kanë vendosur dhe kanë krijuar litarin.
