Të huajt që duan të punojnë apo jetojnë në Shqipëri, tani mund të pajisen me një leje unike në një sportel të vetëm. Ministri i Brendshëm, Bledi Çuçi, shpjegoi sot para deputetëve se me ligjin e ri për emigrantët, të huajt që duan të punojnë dhe jetojnë në Shqipëri, do duhet të drejtohen vetëm në një sportel për t’u pajisur me një leje unike që siguron qëndrimin dhe punësimin në vendin tonë.
Çuçi deklaroi se shtetasit e BE-së, SHBA-së dhe ata të Kosovës, do aplikojnë për një leje qëndrimi 5-vjeçare. Projektligji i ri do i japë të drejtë qëndrimi edhe personave pa shtetësi, kategorisë së personave që punojnë nga distanca në fushën e IT, pensionistët e huaj dhe ata që kanë një pasuri të paluajtshme në territorin e Shqipërisë.
“Projektligji për të huajt është një iniciativë tërësisht e re ligjore. Me këtë legjislacion të ri, po krijojmë procedura më të lehtësuara për lejet e qëndrimit, duke shmangur burokracitë për investitorët dhe fuqinë punëtore.
Ky projekt nuk është iniciativë e shkëputur. Bashkë me ligjin për shtetësinë dhe ligjin për azilin në Republikën e Shqipërinë, plotësojmë regjimin për të huajt në vendin tonë. Janë kryer dëgjesat nga organizata të ndryshme ndërkombëtare, për të garantuar pajtueshmërinë me të drejtat dhe liritë e parashikuara në Kushtetutë”, tha Çuçi. Duke shpjeguar se projektligji i hartuar nga qeveria, siguron pajisjen me leje pune dhe qëndrimi me një dokument të vetëm që do quhet ‘leje unike’ për të huajt që duan të punojnë dhe jetojnë në Shqipëri. Kjo, sipas tij, garanton një procedurë të vetme aplikimi.
Kategoritë që përfitojnë më shpejt
Ministri i Brendshëm ka theksuar se ky projektligj, i jep mundësi përfitimi disa kategorive të cilat deri më sot kanë patur shumë vështirësi burokratike. Me këtë hap u jepet mundësi personave pa shtetësi, duke garantuar standardet për lëshimet e lejes së qëndrimit si dhe kategorisë së punonjësve lëvizës që janë shtetas të huaj e që punojnë nga distanca në fushën e IT.
“Kjo do synojë tërheqjen e tyre në Shqipëri. Kjo i shërben rritjes së konsumit vendas dhe tërheqjes së tyre në Shqipëri, për t’i dhënë shtysë ekosistemeve teknologjike. Një kategori tjetër janë pensionistët e huaj. Ata do aplikojnë për leje për pensionistë.
Kategori tjetër janë të huaj që kanë në pronësi pasuri të paluajtshme në Republikën e Shqipërisë. Kjo përbën investim serioz në këtë treg.
Të rinjtë e huaj që duan të njohin gjuhën dhe kulturën në Shqipëri duke qëndruar në një familje shqiptare. Do bëjmë një hap në politikat për emigracionin e parregullt“, deklaroi ministri Çuçi./ Tirana Today
