Situata me pandeminë është lehtësuar, dhe kjo reflektohet nga numri i personave të infektuar. Burgjet tashmë do të njohin edhe zbatimin e masave lehtësuese anti-Covid. Çdo i dënuar do të zhvillojë katër takime në muaj, takime të cilat do të jenë jo vetëm për familjarët, por edhe më gjerë.
Në bazë të vendimit të ri, të burgosurit gra dhe të mitur do të kenë mundësi për katër takime në muaj, e ndërsa për të burgosurit e martuar, apo që bashkëjetojnë sipas Kodit të Familjes do t’u lejohet një takim i zgjatur në muaj.
Kujtojmë se sipas masave që u përcaktuan në kohën e kulmit të pandemisë, të burgosurit kishin të drejtë të takonin anëtarë të familjes vetëm një herë në muaj, e ndërsa tani është vendosur që të vizitohen katër herë në muaj.
Vlen të theksohet fakti se familjarët që do të lejohen të takojnë të afërmit e tyre, duhet të kenë test ose pasaportë vaksinimi.
