Kryeministri Edi Rama përgjatë një interviste televizive ka folur për lehtësimin e masave në Shqipëri, teksa paralajmëroi qytetarët se ka risk.
Kreu i Qeverisë deklaroi se qytetarët nuk duhet të surprizohen nëse shohin rritje të rasteve të të infektuarve nga koronavirusi në vend.
“Hapja ka risk. Nuk ekziston një skenar që ta presim në shtëpi ikjen e virusit. Ne mund të rrimë në shtëpi mbyllur edhe për një vit, por kjo nuk do të thotë që virusi mund të ketë ikur pas një viti.
S’duhet të surprizohemi nëse shohim rritje të numrave. Duhet të mësohemi të bashkëjetojmë me virusin.
Ne kemi rritur numrin e testimeve çdo javë duke ndjekur ekspertët. Nëse nuk del vaksina, virusi do jetë vërdallë, do jetë gjithmonë një kërcënim potencial.
Jemi në një fazë tranzicioni, në bashkëjetesë me armikun. Njerëzit duhet të jenë të vetëdijshëm që të ruajnë veten!”- tha kryeministri.
I pyetur se kur ka qenë piku për Shqipërinë, Rama i mëshoi faktit se nga Komiteti i Ekspertëve nuk ka dëgjuar se piku ka kaluar.
Po ashtu ai theksoi se vendimet për masat i ka marrë qeveria, por i ka sugjeruar Komiteti.
