Avokatët e ish-ministrit Lefter Koka, i cili ndodhet në burg, janë prononcuar për mediat, ku kanë kundërshtuar faktin që të jepet një masë e dytë sigurie nga gjykata. Sipas tyre, ky është cënim i të drejtave të njeriut.
“Në rastin konkret kemi një masë të dytë të vendosur nga gjykata kërkuar nga Prokuroria, që është e pazakontë për ne. Është cënim i të drejtave të njeriut. Shpresoj që të ketë reflektim.
Bashkohem mendimit që këto dy masa i përkasin të njëjtit fakt penal dhe do të duhet të ishin bashkuar. Vendimi i gjykatës shpallet për shkak të kompleksitetit. Do të shpallet nesër në orën 10:00. Kushtet janë më të lehtësuara. Gjykata do vlerësojë se Prokuroria i ka të gjitha provat. Nuk kemi një ekspertim të tillë sa i takon pretendimit për çështjen e korrupsionit. Po ashtu dhe rreziku i ikjes është i pamundur.”, tha avokati.
Avokati është pyetur nga mediat nëse Koka po tenton të kthehet nga SPAK si bashkëpunëtor i drejtësisë. Ai tha se klienti i tij nuk ka pse ta bëjë këtë gjë. Ndër të tjera shtoi se të jesh i hapur për organin e akuzës dhe pafajësinë, nuk do të thotë se je bashkëpunëtor.
A ka marrë Koka statusin e bashkëpunëtorit?
Avokati: Jeni duke kërkuar një bashkëpunëtor që në caktimin e masës së parë. Ai s’ka pse të pendohet apo bëhet bashkëpunëtor. Pasi ai s’ka pse të pendohet dhe të bashkëpunojë. Të jesh i hapur për organin e akuzës dhe pafajësinë tënde, s’do të thotë se je bashkëpunëtor. SPAK i ka të gjitha mjetet që të kërkojë dhe të gjejë bashkëpunëtor, por jo te Lefter Koka, por të persona të tjerë. Ata mund të sigurojnë cigare apo veshjet e stinës.
Lefter Koka akuzohet për “Shpërdorim të detyrës, në bashkëpunim”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”. SPAK prangosi ish-ministrin e Mjedisit, Lefter Koka për dosjen e shumëpërfolur, atë të inceneratorit në Elbasan. SPAK e akuzon Lefter Kokën për “shpërdorim të detyrës”, “pastrim të parave dhe korrupsion”, duke përfituar miliona euro nga incerenatorët.
