LDK-ja ka paraqitur një kërkesë, për seancë të jashtëzakonshme ditën e shtunë. Raportohet se LDK-ja ka dorëzuar në Kuvend kërkesën për seancë të jashtëzakonshme, për formimin e qeverisë së re. Sipas shefit të Grupit Parlamentar të LDK-së, Arben Gashi, kërkesa është që zgjedhja e Qeverisë së re të Kosovës të mbahet të shtunën e 2 majit.
“Dorëzuam kërkesën e LDK-së dhe deputetëve përkrahës për seancë të jashtëzakonshme për ditën e shtunë, ora 13:00. Pikë e rendit të ditës do të jetë zgjedhja e Qeverisë së Kosovës”, është shprehur Arben Gashi, në një deklaratë para Kuvendit të Kosovës.
Ai ka thënë se koalicioni ka numrat e mjaftueshëm për formimin e qeverisë. “Numrat i kemi. Kërkesa për seancë u bë me 61 nënshkrime. Kemi më shumë vota, por kërkesa u bë me 61 nënshkrime për seancë”, ka thënë ndër tjera ai. Gashi ka deklaruar se është e drejtë e Vetëvendosjes që të dërgojë në Kushtetuese, dekretin e presidentit për dhënien e mandatit për LDK-në.
