Plarent Ndreca nuk do të shërbejë më si Sekretar i Përgjithshëm i Ministrisë së Brendshme.
Lleshaj sqaroi për mediat se Ndreca nuk kishte dhënë dorëheqjen, por kishte lëvizur në një detyrë tjetër. Më tej, ministri mohoi edhe zërat se lëvizja kishte të bënte me tenderat e uniformave blu.
“Së pari, nuk ka një dorëheqje të Sekretarit të Përgjithshëm, ka një lëvizje të Sekretarit të Përgjithshëm në një detyrë tjetër. Ju e dini që administrata publike funksionon si e tërë dhe në kuadër të menaxhimit të kësaj administrate publike bëhen lëvizje, të cilat janë krejt të natyrshme në një strukturë të tillë. Histori me tenderat nuk ka. Sekretari i Përgjithshëm nuk është marrë me tenderat, nuk merret me tenderat, se tenderat kanë një agjenci të specializuar, e cila i kryen ato dhe i nënshtrohen një procesi të veçantë auditimi, verifikimi, hetimi, kur kanë nevojë për t’u hetuar. Por dua t’ju them që gjithçka është në nivelet optimale. Ministria e Brendshme është sot në ditën më të angazhuara të punës së saj për të menaxhuar rendin, sigurinë dhe fusha të tjera të përgjegjësisë”, tha ai.
Plarent Ndreca do të zëvendësohet nga Elena Pici, e cila vjen në detyrë pas angazhimit të saj në Kryeministri. Ajo ka punuar më parë në Bankën e Shqipërisë në Departamentin e Mbikëqyrjes.
