Kreu i PD-së, Lulzim Basha, e ka cilësuar si një ngjarje kriminale largimin nga stadiumi të ish-lojarit të kombëtares, Andi Lila. Basha shprehet se Lila është larguar vetëm për faktin se futbollisti është një nga kandidatët për deputetë, të propozuar nga dega e Partisë Demokratike në Kavajë.
Sipas Bashës, Lila është përballur me një situatë të paprecedentë, teksa po jepte një intervistë në fushën e futbollit të qytetit të tij të lindjes, në Kavajë. Ai u përzu nga fusha e blertë në Kavajë, dy ditë më parë. Ndër të tjera, Basha tregon se ka patur një telefonatë me Andi Lilën, dhe mjaft i irrituar shkruan se askush nuk do u’a mbyllë gojën.
Statusi
Kjo është e turpshme dhe kriminale!
Sapo përfundova një telefonatë me Andi Lilën, një nga yjet e futbollit shqiptar, të cilit policia i kërkoi të largohej nga fusha e futbollit në qytetin e tij të lindjes në Kavajë, ndërkohë që jepte një intervistë për media. Kjo vetëm për faktin se Lila është një nga kandidatët për deputetë propozuar nga PD Kavajë!
Kjo duhet të marrë fund! Askush nuk do të na mbyllë gojën! Në demokraci çdokush ka të drejtë të thotë çfarë të dojë. Ne do ta mbrojmë me forcë këtë të drejtë të fituar me sakrifica dhe nuk do lejojmë që Shqipëria të kthehet sërish në diktaturë.
