FIFA mund të nxjerrë në pension asistentët, ndërsa parashikohen robotë në vijën anësore. Një prej pjesëtarëve të FIFA-s, ka thënë për të përditshmen angleze “Daily Mirror” se sistemet e reja teknologjike kanë nisur të eksperimentohen. Tashmë FIFA po eksploron mundësinë e largimit të gjyqtarëve anësorë nga fusha, dhe zëvendësimin e tyre me robotë, që mendon se mund ta bëjnë shumë më mirë punën, sidomos në rastin e verifikimit të pozicionit jashtë loje.
Personi që dëshiron që të ruajnë anonimatin, ka thënë se kanë një departament të dedikuar ekskluzivisht për të futur teknologjinë në futboll. “Kemi një departament të dedikuar ekskluzivisht për të futur teknologjinë në futboll”, shprehet funksionari i FIFA-s. Me gjasë, nëse këta robotë do të jenë eficientë, mund të dërgojnë në pension edhe asistentët.
“Vite më parë diskutuam për moviolën në fushë dhe ia dolëm. Shumë shpejt po punojmë që të hedhim robotët në vijat anësore të fushës, të cilët do të ‘vrapojnë’ përgjatë linjave, siç bëjnë asistentët e arbitrit, për ta shkurtuar edhe bisedimin me VAR-in, pasi në këtë mënyrë do ta kemi përgjigjen e pozicionit jashtë loje brenda 1 sekonde dhe jo më gjatë.
E thënë ndryshe, e njëjta teknologji e përdorur për golin fantazmë do ta sjellim edhe për pozicionin jashtë loje. Kolaudimet kanë muaj që kanë nisur dhe nëse gjithçka do të shkojë sipas planeve tona, ndoshta këtë risi mund të nisim ta testojmë që nga sezoni që pritet të nisë. Sigurisht, që teknologjinë nuk mund ta përdorim dot për lojtarët që simulojnë apo për faullet që shpëtojnë, por për të tilla gjëra si ‘offside’ dhe gol fantazmë, gjërat janë shumë më të lehta”, shprehet burimi i FIFA-s.
Madje, duke u bazuar te e përditshmja “Mirror”, ndoshta Premier Liga do të jetë kampionati i parë që mund ta eksperimentojë vijërojtësin e robotizuar që nga ky sezon që vjen. Madje, kanë nisur të qarkullojnë edhe emrat e katër stadiumeve që do ta implementojnë të parën këtë “RoboRefs” teknologjinë: “Etihad” (stadiumi i Mançester Sitit), “Old Trafford” (stadiumi i Mançester Junajtidit), “Anfield Road” (stadiumi i Liverpulit) dhe Stamford Bridge (stadiumi i Çelsit).
