Java e 32 e Superligës ka dhuruar rezultate surprizë. Skënderbeu ka pësuar një humbje drastike në Laç, kur kishte të gjithçka në dorë pas dy golave të Ali Sowe. Kjo ishte humbja e dytë radhazi e korçarëve, të cilët pas disfatës në shtëpi me Kukësin duhet të shtyjnë sërish festën e titullit kampion. Korçarët kaluan të parët në avantazh në 2-0 me golat e Sowe, por u përmbysën nga vendasit në 2-3, që arritën të marrin tre pikë me shumë vlerë.
Ndërsa në “Zeqir Ymeri”, verilindorët e Pacult kanë bërë detyrën përballë Lushnjës së vendit të fundit, duke e mposhtur me rezultatin 2-1. Për verilindorët, shënoi Guri në pjesën e parë dhe Balde në të dytën, teksa në fraksionin e parë kishte barazuar Pepa me penallti.
Ndërsa përballja tjetër në qytetin e Kamzës është ndarë në barazim të bardhë pa gola. Vendasit edhe pse kanë tentuar nuk kanë arritur të shënojnë, përballë një Luftëtari shumë të organizuar dhe që në këtë ndeshje nuk kishte lojtarin kryesor, Kristal Abazaj për arsye dëmtimi.
