Pas periudhës së vështirë që kaloi me infektimin nga COVID-19, deputeti Adriatik Alimadhi e cilësoi si virus vrasës. Në një lidhje telefonike për emisionin “Repolitix” në Report Tv, Alimadhi tregoi 36 ditët e ‘tmerrit’, dhe vështirësitë që hasi gjatë kohës që ishte i infektuar. Teksa apeloi ndaj të gjithë shqiptarëve që te jenë të kujdesshëm, ai tregoi se nuk e ka kaluar lehtë si fizikisht dhe nga ana psikologjike.
“Kam qëndruar 35 ditë i shtruar, dhe jam ngritur në ditën e 36-të. Unë nuk e kalova lehtë si proces, as fizikisht por dhe nga ana psikologjike.
Bashkëshortja e kaloi më lehtë se unë. Kam kaluar shumë viroza e grip të ndryshme, por si këtë radhë nuk e kam ndjerë kurrë veten.
Ky nuk është grip, por një virus vrasës. U them shqiptarëve të bëjnë kujdes nga ky virus që merr jetë njerëzish, mos u rëntë kurrë.
Ka qenë një virus që kërkonte të pushtonte të gjitha organet e brendshme, deri sa të bllokonte të gjithë frymëmarrjen, nuk është një gjendje gripale që kalon me një kurim të lehtë. Ky nuk ka një kurë. Virusi kap organet e brendshme.
Të qëndruarit kaq gjatë në spital, më përkeqësoi edhe gjendjen emocionale. 36 ditë ishin shumë të lodhshme, të sikletshme dhe të bezdisshme për mua”, tha Alimadhi.
