Në vetëm 4 ditët e para të punës në terren, në “sitën” e OFL-së kanë kaluar 14 persona të dënuar për krime të rënda. 7 prej tyre u është sekuestruar pasuria, vlera e të cilëve përllogaritet në disa milionë euro, ndërsa 7 të tjerëve u është dorëzuar për plotësim vetëm formulari me shkrim i auto-deklarimit. Të gjithë këtë punë të policisë, gazetarja Klodiana Lala e ka cilësuar një turp të madh.
Sipas saj, për Lulzim Berishën, garant ka dalë Vangjush Dako. “Vangjush Dako ka dhënë garanci që ky person është i varfër, dhe unë do ta punësoj në Bashki me 300 mijë lekë”, tha Lala. Sa i përket pronave të sekuestruara të Altin Hajrit, gazetarja tha se në listë ishte dhe një karburant i cili i është shitur në vitin 2015 një nga biznesmenëve më të fuqishëm në vend.
“Kemi dhe Altin Hajrin, karburanti i është shitur një prej biznesmenëve me të fuqishëm sot në vend. Është shitur në vitin 2015 dhe policia e liston si pronë të sekuestruar”, u shpreh më tej ajo.
“Policia e Shtetit, kemi patur ministrin, sepse thoshte që këtu nuk ka krim, vrasjet janë ulur. Tani vjen një pikë kur z. Leshaj nxjerr këtë akt normativ duke pranuar që situata e krimit është në situatë alarmante. Nuk ka shqiptar, jo gazetar që të thotë se nuk duhet luftuar krimi. Ky është turpi juaj, e bëni sa për sy e faqe”, tha ajo.
