Kush janë diabetikët më të rrezikuar nga koronavirusi? Mjeku nxjerr faktet

Diabetikët janë një kategori mjaft e riskuar për koronavirusin, por jo të gjitha rastet përfundojnë me ndarje nga jeta. Këtë gjë e ka shpjeguar mjaft mirë mjeku endokrinolog, Florian Toti. I ftuar në studion e “Abc News”, ai foli për personat me diabet dhe se sa rrezikojnë nëse infektohen me koronavirus. Për diabetikët, një tjetër faktor mbetet edhe mosha e pacientit të infektuar. Sipas tij, personat me diabet në moshë të re, kanë pothuajse të njëjtin risk për ta kaluar si popullata e përgjithshme.

“Diabeti hyn te ata riskantët. Por kjo nuk do të thotë diabet baraz me fatal. Kjo varet edhe nga mosha. Personat me diabet në moshë të re, kanë pothuajse të njëjtin risk për ta kaluar si popullata e përgjithshme. Në Shqipëri rreth 6% e popullatës është e diagnostikuar me diabet. Janë shifra si në të gjithë botën. E veçanta për personat me diabet, është sa i ekuilibruar është diabeti”, u shpreh ai.

Mes diabetit 1 dhe 2, kush janë më të rrezikuarit? Toti tha se ata të tipit 2 janë më të rrezikuar, për shkak edhe të moshës.

“Nëse diabeti nuk është i kontrolluar, atëherë këta persona janë më të rrezikuar. Dallimi i diabetit 1 apo 2, hyjnë në lojë elementë të tjerë. Jo detyrimisht diabeti është shumë i rrezikuar, por diabet i pakontrolluar dhe futet edhe elementë të tjerë si mosha.

Diabeti e ul imunitetin. Por tip 1, janë deri diku më të mbrojtur. Por në diabetin tip 2, imuniteti është më i ulët, për shkak edhe të moshës. Unë nuk do bëja dallim, diabeti plus mosha është ai që ka rrezik më shumë, si edhe diabeti i pakontrolluar”, u shpreh mjeku.