Atentati ndaj Hekuran Billës në zonën e Komunës së Parisit, po shkon drejt zbardhjes. Adjola Lakra është personi i tretë i arrestuar nga policia, lidhur me vrasjen e Hekuran Billës në Tiranë. 26-vjeçarja ka nxjerrë në pritë Hekuran Billën, duke i dhënë autorëve të dhëna të sakta për vendndodhjen e tij.
Ajo do të merret në pyetje nga policia, pasi e kanë arrestuar me urdhër të Prokurorisë së Tiranës. Policia ka zbuluar nga tabulatet telefonike se 26-vjeçarja ishte edhe telefonata e fundit e viktimës, i cili kishte shkuar për ta takuar, aty ku Adjola Lakra i kishte lënë vendin e takimit.
Por Hekuran Billa nuk e takoi dot kurrë të dashurën. Lidhur me këtë ngjarje janë lënë në pranga Sebastjan Mali dhe Viktor Marku, ky i fundit vëllai i Prel Markut, i vrarë nga Billa në vitin 2006 në Londër.
Billa u vra me 11 plumba në zonën e Komunës së Parisit, teksa po lëvizte me automjetin e tij BMW X6.
Por cili ishte roli i Adjola Lakrës? Ajo prej dy vitesh ishte e dashura e Hekuran Billës, por sipas burimeve, është detyruar nga Viktor Marku dhe Sebastjan Mali që të nxjerrë në pritë të dashurin e saj.
