Lëvizja Vetëvendosje e ka refuzuar ftesën e kryeministrit, Avdullah Hoti për të marrë pjesë në diskutimet e thirrura nga qeveria.
Sipas zëdhënësit Arlind Manxhuka, Hoti i ka dërguar një letër Albin Kurtit për të diskutuar për dialogun me Serbinë, por ai e ka refuzuar.
“Një qeveri e varur dhe mundësuar nga votat e Listës Serbe, dhe e formuar nga Thaçi si dhe një qeveri që ia heq shtetit të Kosovës reciprocitetin me Serbinën nuk ka as kredibilitet as legjitimitet. Prandaj ne nuk i jemi përgjigjur asaj ftese sepse nuk do të jemi pjesë të këtyre takimeve”, shkruan ai në postimin e tij në Facebook.
Hoti ka prezantuar mekanizmin e tij për dialogun me Serbinë, i cili pritet të çojë drejt një marrëveshjeje përfundimtare për paqe mes dy vendeve. Ai ka propozuar një “forum të liderëve” për bisedimet me palën nga Beogradi.
Kujtojmë se dialogu mes dy vendeve është pezulluar nga nëntori i vitit 2018, kur autoritetet kosovare vendosën taksën 100 përqind mbi mallrat e Serbisë dhe Bosnje-Hercegovinës.
