Kryeministri Albin Kurti është prononcuar për mediat, pas arritjes në Brdo të Sllovenisë ku po mbahet samiti BE-Ballkani Perëndimor. Ai tha se Kosovës i është bërë një padrejtësi e madhe nga BE-ja për mosliberalizimin e vizave, por mbetet me shpresë se Unioni do të mbajë fjalën e dhënë.
“Komisioni Europian për të dytën herë rekomandoi liberalizimin e vizave për qytetarët e Kosovës, dhe është bërë një padrejtësi e madhe ndaj qytetarëve tonë që vuajtën shumë”.
“Ne jemi me shpresë që ky Samit do të bëjë BE-në të qëndrojë besnike në thelbin e saj, dhe ky është zgjerimi si projekti më i rëndësishëm politik dhe proces historik i paqes dhe prosperitetit që nga Lufta e Dytë Botërore”.
“BE duhet të vazhdojë zgjerimin për t’u bërë Europë dhe gjashta e Ballkanit Perëndimor është rajoni që BE-së i mungon të bëhet Europë. Ne jemi në Europë, por BE-ja duhet të bëhet Europë. Avokoj për më pak frikë nga ana e BE-së dhe për më pak zemërim nga ana e gjashtë vendeve të Ballkanit Perëndimor”.
Në këtë samit, Kosova do të përfaqësohet nga kryeministri Albin Kurti, ministrja e Punëve të Jashtme, Donika Gërvalla dhe ministri i Financave, Punës dhe Transfereve, Hekuran Murati. Vendet anëtare që nuk kanë njohur shtetësinë e Kosovës janë: Spanja, Sllovakia, Qiproja, Rumania dhe Greqia.
I pyetur nëse kthimi drejt Kinës dhe Rusisë është mundësi për Kosovën, Kurti është përgjigjur menjëhere me “jo”.
“Ne kurrë nuk kemi marrë as një vaksinë të vetme nga Federata Ruse apo Kina. Bashkimi Evropian është destinacioni ynë dhe Evropa është kontinenti ynë”, ka thënë Kurti.
