Komunizmi cilësohet shpesh si më i tmerrshëm se fashizmi. Kjo pasi veç terrorit, burgosjeve dhe vrasjeve, synoi të shkatërrojë qelizën bazë të shoqërisë; familjen.
Në Bashkimin Sovjetik, të gjithë u mësuan të ishin spiunë, madje edhe fëmijët. Të ashtuquajturit “Pionerë” të Stalinit, mësoheshin të tregonin besnikëri absolute ndaj partisë dhe popullit, duke tradhtuar deri edhe prindërit e tyre.
Në vitin 1932, 15-vjeçari Pavlik Morozov, denoncoi si kulak tek policia sekrete babain e tij Trifon Morozov. I ati u pushkatua pas një gjyqi formal. Pa asnjë brejtje ndërgjegje, i riu nisi të spiunojë të tjerët në fshat. Disa ditë më vonë, u gjet i therur me thikë.
Krimi mund të ishte kryer nga kushdo, por fajtorë u shpall familja e viktimës, anëtarët e së cilës u pushkatuan. Stalini deshi ta bënte Morozovin një shembull për gjithë rininë sovjetike, duke e shpallur të riun martir.
Edhe në Shqipëri, Enver Hoxha ndoqi shembullin e Stalinit, me krijimin e organizatës së pionerit.
TIRANA TODAY
