Ende nuk ka një datë se kur mund të vijë vaksina në Shqipëri. E ky mister duket se do të vijojë edhe për pak. Mira Rakacolli tha se gjatë tre mujorit do të nisë shpërndarja e vaksinës, e cila do të jetë falas.
Kryetarja e Komitetit Teknik të Ekspertëve, njëherësh zv. ministre e Shëndetësisë, e ftuar në studion e ABC, u shpreh se vaksina nuk do të jetë e detyruar.
“Nuk kemi një datë të saktë. Do të jetë brenda 3 muajshit të parë të vitit 2021. Vaksina nuk do të jetë e detyruar dhe do të jetë falas”, tha Rakacolli.
E pyetur nëse duhet ta bëjnë vaksinën personat që e kanë kaluar virusin, Rakacolli shtoi se për këtë ka dy këndvështrime.
“Në ato që ne diskutojmë, ka qëndrime të ndryshme. Ka shkolla që thonë se nuk ke nevojë ta bësh, por ka edhe shkolla të tjera që rekomandohet pas një periudhe si 6 muaj apo më pas”, tha ajo.
