Ish-deputeti i PD Edmond Spaho në një deklaratë për mediat u shpreh se qeveria është e përfshirë në afera mafioze. Ai foli me emra duke u shprehur se sipas përgjimeve të fundit del se Rama nuk është distancuar nga skandalet dhe nuk ka dënuar askënd, pasi në të janë të përfshirë emra të rëndësishëm si: ish-ministri Fatmir Xhafaj, Taulant Balla, dyshja Marku- Prela si dhe Andon Marko.
Edmond Spaho theksoi se Prokuroria nuk ka vepruar për rastet e fundit mafioze, por është bërë palë me Edi Ramën dhe krimin e organizuar.
“Shqiptarët kanë dëgjuar përgjimet e fundit që dëshmojnë sesi vëllai i ish-ministrit të Brendshëm Agron Xhafaj kontrollon trafikun e drogës në Vlorë. Qytetarët kanë dëgjuar sesi drejtuesit më të lartë të Policisë së Shtetit i kanë paguar para në dorë aktorit të qeverisë Fredi Alizoti i dënuar më parë për trafik droge në mënyrë që të gënjente se ishte ai dhe jo Agron Xhafaj personi që kontrollon trafikun e drogës në Vlorë. Përgjimet zyrtare tregojnë se ky skenar kriminal është vënë në zbatim nga një bashkëpunim mes drejtuesve më të lartë të policisë, kupolës politike të Rilindjes dhe qeverisë, me përfshirje direkte të Prokurorisë dhe Shërbimit Informativ Shtetëror.
Një Javë pas publikimit të skandalit mafioz, çdo shqiptar e ka kuptuar se i përfshirë është vetë Edi Rama dhe bashkëpunëtorët e tij më të afërt politikë. Ai as nuk është distancuar nga ky akt mafioz e jo më të dënojë çdokënd që është përfshirë në skandal. Rama nuk ka reaguar sepse në skandal është përfshirë ish-ministri Fatmir Xhafaj, Taulant Balla, dyshja Marku- Prela si dhe Andon Marko, që sot duhet të ishte në burg. Rama ka kthyer shtetin në sistem kriminal, pasi policët e inkriminuar gradohen, kurse ata që denoncojnë largohen nga vendi”, tha Spaho ndër të tjera.
