Kryeministri Rama ka vazhduar edhe ditën e sotme fushatën elektorale të zgjedhjeve të 30 qershorit, ku pasditen e sotme është ndalur në Patos. Ai ka përsëritur të njëjtat qëndrime sa i përket datës së zgjedhjeve, duke hedhur poshtë çdo mundësi që ato të shtyhen.
Sa i përket vendimit të Presidentit Meta, Rama e ka ironizuar për deklaratat e tij se është i shqetësuar se vendi do të shkojë në konflikt civil. Kreu i qeverisë i ka dhënë edhe një zgjidhje Metës, ku i sugjeruar që të qetësojë Monikën dhe ti thotë Saliu që të qetësojë Lulin.
“Të gjithë këta, por Meta më shumë, i fryn konfliktit civil, kthimi i 1997, dhe thotë se është shumë i shqetësuar deri në pikën që në mes të fushatës ndërhyri duke fshirë firmën e tij me firmën e tij, një marrëzi, por gjithë shqiptarët e kuptojnë…
Nëse është vërtetë i shqetësuar, atëherë le t’i thotë Monikës të qetësohet, t’i thotë Saliut të qetësojë Lulin, dhe nuk ka njeri që del më në rrugë, është kaq e thjeshtë. Është po kaq e thjeshtë që ne në 30 qershor do të bëjmë zgjedhjet.
Ça arsye kam unë të bredh gjithë Shqipërinë për të bërë këtë fushatë, dhe të dalin kaq shumë njerëz në mes të vapës kudo që shkoj unë, kur në qeveri kemi gjithë ato punë për të bërë, mbështetjen nga parlamenti i shumicës sonë e kemi të plotë, 75 % të nivelit qendrorë e kemi ne, atëherë ku është problemi për t’i shtyrë zgjedhjet?
Nuk kemi asnjë problem ne, por sepse do të ishte shume e përkohshme kjo zgjidhje ndërkohë që ajo që do të vinte pas do të ishte një e keqe shumë e gjatë, që do të zgjateshin gjithnjë zgjedhjet, dhe procesi do të bëhej çështje tekash partish”, u shpreh kreu i ekzekutivit.
