Kreu i Grupit Parlamentar të PS-së, Taulant Balla ka reaguar pas kthimit të paketës Anti-Shpifje nga presidenti Meta ditën e djeshme.
Përmes një deklarate për mediat, Balla u shpreh se Meta iu bind urdhrit të Lulzim Bashës. Ai theksoi se dekreti i kreut të shtetit do të rrëzohet në Kuvend sa më shpejt të jetë e mundur.
“Kudo në botën demokratike dihej se Presidenti Meta pas urdhrit të Bashës do të kthente mbrapsht përmes dekretit dy ligjet komponentë të kësaj pakete të parë të betejës me shpifjen. Edhe në të ardhmen, legjislacioni shqiptar duhet të përmirësohet për të garantuar fitoren e së vërtetës ndaj shpifjes.
Përmirësimet ligjore janë certifikuar tërësisht nga partneri i rëndësishëm OSBE, edhe në kuadër të faktit historik që ne e drejtojmë tani. Mban 57 vende dhe 1 miliardë persona. Më 20 janar dekretet i njoftohen Kuvendit, dhe në seancën më të parë dekretet e z. Meta do të rrëzohen”, tha ai.
Kujtojmë se presidenti Meta e ktheu paketën Antishpifje për rishikim, pasi kishte konstatuar 4 shkelje të rënda. Sipas tij, disa dispozita binin në kundërshtim me:
- Parimet themelore kushtetuese të ndërtimit të një shteti demokratik,
- Sigurisë juridike dhe të proporcionalitetit,
- Dispozitat kushtetuese që mbrojnë të drejtën e lirisë së shprehjes,
- të lirisë së shtypit dhe të drejtës së informimit;
