Gjatë muajit dhjetor do të ketë prezencë të shiut dhe borës. Sinoptikania e Meteoalb, Lajda Porja, tha në emisionin “Vila24” në “News24” se do kemi një muaj me reshje të bollshme dhe karakteristike është dëbora e cila do jetë shumë e pranishme.
Porja thekson se ky dhjetor kthen dimrin e para viteve ’90, tipik me temperatura të ulëta dhe borë.
Sakaq, këtë fundjavë parashikohet të jetë me reshje shiu. Sipas saj, e shtuna pritet të ketë alternime kthjellimesh, ndërsa dita e dielë dhe e hëna do kenë reshje shiu të konsiderueshme.
Sot moti parashikohet kryesisht i vranët. Reshjet e shiut do të bëhën të pranishme me intensitet të ulët. Në pjesën bregdetare e kryesisht në veriperëndim e jugperëndim të vendit, reshjet e shiut do të marrin formën e rrebesheve me rrufe.
Në alpe, reshje bore me intensitet deri mesatar. Në mbrëmje reshjet e borës do të prekin edhe lartësitë mbi 1100 metër në verilindje të vendit me intensitet të ulët. Mjegulla e mjegullina parashikohet të përfshijë zonat luginore të vendit.
Era do të fryjë nga kuadrati i jugut dhe shpejtësi mesatare dhe përgjatë vijës bregdetare dhe zonave luginore, era hera herës e vrullshme. Në mbrëmje era kthen nga verilindja duke sjellë rënie temperaturash. Valëzimi në dete i forcës 4 deri 5 ballë.
Temperaturat parashikohen:
në zona malore 4 deri 10°C, në zonat e ulëta 6 deri 17°C në zona bregdetare 9 deri 18°C
