Kryetari i ri i Parlamentit Evropian, David Sassoli shprehet se Shqipëria dhe Maqedonia e Veriut kanë bërë përpjekje të jashtëzakonshme për t’u bërë anëtare të Bashkimit Evropian. Ndërsa shtoi se këto dy vende duhet të ndihmohen në rrugën drejt suksesit.
Sipas tij, bllokada e bisedimeve është një pengesë e vogël, e cila do të tejkalohet në muajt e ardhshëm.
“Vendosa të vizitoj së pari Maqedoninë Veriore, e cila është jashtë BE-së, dhe më pas do të shkoj në Shqipëri. Kjo sepse besoj se këto dy vende kanë bërë përpjekje të jashtëzakonshme për t’u bërë anëtare të BE-së”, deklaroi Sassoli për agjencinë e lajmeve “MIA”.
Ndër të tjera, Sassoli theksoi se gjashtë muajt e ardhshëm do të jenë shumë të rëndësishëm. “Mendoj se duhet të arrijmë në një konsensus nga pala evropiane deri atëherë. Një numër i kërkesave janë dërguar në Maqedoninë Veriore dhe Shqipërinë dhe tani duhet të sinjalizohen se ato janë në rrugën e duhur”.
