Mjekja personale e kreut të opozitës ruse Aleksei Navalny, ka deklaruar se ekziston mundësia që Navalny të jetë helmuar me lëndë kimike. “Nuk mund të përjashtojmë që lëkura e tij të jetë ekspozuar ndaj një lënde helmuese dhe të jetë dëmtuar nga një palë e tretë me një substancë kimike të panjohur”, tha mjekja Anastassia Vassilieva pasi vizitoi zotin Navalny në spital.
Navalny po vuante një burgim 30-ditor kur u shtrua në spital mëngjesin e së dielës, pas asaj që autoritetet e përshkruan si një “reagim të rëndë alergjik”. Ai tashmë ka dalë nga spitali dhe është kthyer në burg. Një zëdhënëse e Navalny-it tha se udhëheqësi i opozitës, një kundërshtar i rreptë i Kremlinit, erdhi në spital me “ënjtje të rënda të fytyrës dhe skuqje të lëkurës”. Ajo tha se Navalny nuk kishte pasur “kurrë më parë ndonjë reaksion alergjik”.
Të hënën, një përfaqësues i spitalit ku po trajtohej zoti Navalny u tha agjencive perëndimore të lajmeve se ai është në “gjendje të kënaqshme”.
