Zërat se kush do ta pasojë Edi Ramën në krye të Partisë Socialiste nuk shuhen, megjithëse akoma nuk ka ndonjë shenjë në horizont që Rama të largohet nga politika.
Dy emrat më të lakuar si pasardhës janë Saimir Tahiri dhe Erion Veliaj. Por asnjë prej tyre nuk e ka pranuar ‘sfidën’.
Kreu i Bashkisë së Tiranës, Erion Veliaj i pyetur në In TV se kur do të vijë dita të jetë kryeministër tha prerazi ‘asnjëherë’.
Më tej kryebashkiaku ka treguar se ka pasur një bisedë me kryeministrin Rama, kur e ka pyetur atë, se cila punë ishte më e mirë dhe më e bukur, ajo e kreut të bashkisë apo e kreut të qeverisë.
Kur do të vijë dita që do të jesh Kryeministër?
Asnjëherë me thënë të drejtën. Sepse kam rënë në dashuri me punën që bëj. Dhe do i rri punës që pëlqej më shumë. E kam pyetur edhe Edin në fakt, se kush është punë më e bukur dhe ma ka pranuar se ajo e Kryebashkiakut. Kështu që unë do vazhdoj të bëj punën e Kryebashkiakut, sepse e dua punën time.
Është më rehat ministër apo kryetar Bashkie?
Ministër nuk është rehat se kishte shumë punë. Kjo është më e vështirë, por është edhe më e bukur.
