Kryetarja e LSI-së, Monika Kryemadhi, nuk ka të ndalur akuzat ndaj Ramës. Teksa moderatori Çim Peka e quajti kryeministrin Edi Rama një “kfashë politike”, Kryemadhi e etiketoi “zvarranik”. Ajo tha se Ramën e shikon si një humbës, pasi nuk është i zoti që të fitojë me ndershmëri në asnjë betejë politike.
Kryemadhi tha se kryeministri Rama, në pushtet nuk ka ardhur në sajë të punës së tij, por për aleancat e tij. Ajo shtoi se me marrëveshjen e 17 majit, kreu i PD-së i dha oksigjen Ramës për të marrë mandatin e dytë të qeverisjes.
“Nuk mund ta quaj kafshë politike Edi Ramën. Mund ta quaj zvarranik. Nuk e shoh z. Rama të fitojë me ndershmëri në asnjë betejë politike.
Një herë me Metën, një herë me Gramoz Ruçin, një herë me Lulzim Bashën. Rama nuk ka fituar asnjë herë i vetëm në zgjedhje.
Lulzim Basha i dha oksigjen më 17 maj. Edhe LSI i ka dhënë oksigjen. Duhet të mësojmë nga gabimet.
Mos e quani kafshë politike. Atë që bën Rama, mund ta bëjë çdo shqiptar. Unë zvarranikun e shoh si diçka të shpifur”, tha ndër të tjera Kryemadhi.
