Pavarësisht kritikave të shumta, këto të ardhura në formë ironie edhe nga kryeministri Rama, kryetarja e LSI-së nuk do t’ia dijë për të mbajtur maskë. Në një konferencë me mediat, Kryemadhi tha publikisht se nuk do ta mbajë maskën, pavarësisht vendimit të qeverisë për mbajtjen me detyrim të saj në çdo ambient.
Ajo ndër të tjera zbuloi se ka marrë kritika nga kreu i shtetit, Ilir Meta, për mos-mbajtjen e maskës, ndërsa shtoi se ai i mban dhe distancë sociale.
“Kam marrë kritika nga presidenti, madje më mban distancë sociale sa i përket COVID-it. Kryeministri ka mbaruar Institutin e Arteve, un për Biokimi. Di të dalloj si të ruhesh nga një pandemi dhe gjendje virale. Po të mos kesh frikë nga uji, të lahesh, të ruash distancimin, është më e vështirë për të kapur virusin.
COVID-19 është një çështje që ka të bëjë me imunitetin, por shqiptarët nuk mund të kenë imunitet të fortë kur nuk hanë dot bukë. LSI-në nuk e kap virusi, pavarësisht se mund të kapë ndonjë, e kalon lehtë, pa problem”, tha Kryemadhi.
