Vizita e zyrtarit të lartë të Departamentit Amerikan të Shtetit, Hoyt Brian Yee, pritej të sillte propozime shtesë mbi zgjedhjen e krizës politike.
Por, në takimet që Yee zhvilloi ditën e sotme, nisur që me kryeministrin Edi Rama, kreun e Partisë Demokratike, Lulzim Basha dhe kundërshtarët e këtij të fundit, artikuloi të njëjtin mesazh për domosdoshmërinë e pjesëmarrjes së opozitës në zgjedhje dhe se 18 qershori duhet të jetë dita e votimeve.
Hoyt Brian Yee, i cili largohet pas pak kohësh nga detyra, saktësoi se mospjesëmarrja e Partisë Demokratike, dëmton atë vetë si parti politike dhe ecurinë e Shqipërisë drejt integrimit në Bashkimin Evropian.
“Duhet dialog mes palëve, koha po skadon por jemi optimistë. Zgjedhjet janë gjithmonë më të mira kur ka përfaqësim të gjerë. Zgjidhja duhet të vijë nga liderët politike, shpresojmë që do të ketë zgjedhje. Ka një ofertë nga McAllister e cila është e mirë. Shpresojmë që partitë ta pranojnë. Nuk besojmë se Rama dëshiron të qeverisë pa opozitën. Bojkoti nuk është një taktikë fituese. Asnjë parti që ka bojkotuar nuk ka përfituar. Nëse zgjedhjet certifikohen si të rregullta nga BE, OSBE dhe SHBA-ve, do t’i njohim”, u shpreh sot Yee për gazetarët.
Të njëjtin mesazh Yee u ka adresuar edhe kreut të selisë blu, Lulzim Bashës dhe aleatëve të tij, duke i lënë në tryezë paketën “McAllister”.
Kjo paketë u hodh poshtë nga kreu i PD-së, që në takimin e mëparshëm midis zëvendëspresidentit të Partive Popullore Evropiane dhe liderëve politikë.
Paketa “McAllister” parashikon:
- Shtyrjen e zgjedhjeve më 16 korrik
- Zëvendësimi i katër ministrave të kabinetit Rama me persona teknikë të zgjedhur nga kryeministri Rama dhe të aprovuar nga opozita
- Zgjedhja me konsensus e Avokatit të Popullit, kalimin e kryetarit të KQZ-së opozitës, por jo shumicën në KQZ
- Dakordësimi për një tryezë të rrumbullakët të OSBE-së, pjesëmarrje te OJQ-ve në gjithë këtë proces.
Kërkesat e Opozitës:
- Praninë e katër ministrave teknikë të përcaktuar nga Rama
- Në qeverinë teknike kryeministri të propozohet nga Partia Socialiste, Edi Rama apo mazhoranca
- Data e zgjedhjeve kondicionohet nga një sërë procesesh për të garantuar votën e qytetarëve shqiptarë
- Votimi biometrik, elektronik dhe numërimi elektronik i votave të shqiptarëve.
(TIRANA TODAY)
