Presidenti Ilir Meta ka folur sërish lidhur me krizën politike në vend, teksa u shpreh se kemi edhe një krizë institucionale. Ai bëri sërish thirrje për zgjidhjen e kësaj krize me anë të dialogut, ndërsa kërkoi që klasa politike të mos fshihej pas ndërkombëtarëve, siç edhe ka ndodhur.
Meta tha se palët po nxitojnë duke e thelluar këtë krizë, ndërsa sa i takon rrezikut rus, presidenti u shpreh se “jemi të ndërgjegjshëm për ndikimet toksike të Rusisë, por krizat janë krijuar nga vetë ne.”
Fjala e plotë e Metës:
Dua t’ju siguroj se presidenti ka bërë të gjitha veprimet e tij prej kohësh për të evituar këtë krizë serioze, jo vetëm politike, Kushtetuese, institucionale por edhe përfaqësimi tashmë.
Është për të ardhur keq që palët kanë nxituar dhe nxitojnë për të thelluar këtë krizë. Është detyra ime për të bërë thirrje për reflektim nga të gjithë sepse duhet të shikojmë interesin e vendit dhe të qytetarëve tanë që kërkojnë normalitet, por edhe të vazhdojnë të shtojnë kontributin e Shqipërisë si faktor stabiliteti në këtë rajon me sfida të rëndësishme. Kjo situatë e brendshme nuk na ndihmon në këtë drejtim.
Klasa politike shqiptare duhet të marrë përgjegjësitë e saj nuk duhet të fshihet pas asnjë ndërkombëtari siç ka ndodhur tani dhe çështjet duhet të zgjidhen me dialog në mënyrë parimore, larg pazareve dhe keqpërdorimeve qoftë edhe të ndonjë ndërkombëtari.
Jemi të ndërgjegjshëm për ndikimet toksike të Rusisë në rajonin tone, por nuk besoj se ky është problem në rastin e Shqipërisë.
Nuk duhet ta katandisim rrezikun rus si rrezikun anglo amerikan për të fshehur të vërtetat e kësaj krize kushtetuese, morale dhe përfaqësimi të cilat janë krijuar nga ne./ Tirana Today
