Kryeministri Edi Rama ka zgjedhur që t’u përgjigjet të gjithë kritikëve lidhur me vendosjen e ushtrisë në Rinas, pas grabitjes të së martës, që e cilësuan këtë një veprim “antikushtetues”.
Rama ka publikuar një foto në Instagram, që tregon forcat e sigurisë në aeroportet ndërkombëtare, teksa shprehet se raste të tilla janë të shumta edhe në vende të tjera të Evropës dhe botës demokratike.
“Forcat ushtarake në aeroportet e Parisit, Venecias, Frankfurtit dhe Amsterdamit, janë vendosur ashtu si në plot vende të tjera të Europës dhe botës demokratike, si reagim ndaj akteve cenuese për sigurinë e infrastrukturave aeroportuale dhe qytetarëve që i përdorin ato. Ndërkohë beretat e kuqe të policisë sonë ushtarake janë vendosur thjesht në ruajtje të perimetrit të jashtëm të sigurisë. Prandaj kush flet për shkelje kushtetute, gjendje lufte, juntë ushtarake e marrëzira të tjera si këto, le të gjejë ndonjë arsye tjetër për të treguar se sa shumë i dhimbsen Kushtetuta dhe standardet demokratike”, shkruan Rama në Instagram.
