Analisti Fatos Lubonja ka folur mbi shanset e Shqipërisë për hapjen e negociatave me Bashkimin Evropian.
Teksa ishte i ftuar në “News24”, Lubonja ka komentuar deklaratën e Federica Mogherinit, për të cilën tha se ajo duhet të pyesë veten se pse vendet e Ballkanit Perëndimor nuk i plotësojnë dot kushtet e kërkuara.
Po ashtu, analisti u shpreh mes të tjerash se vendi ynë nuk i ka përmbushur kushtet për hapjen e negociatave
“Problemi është që ka ardhur një moment në Europë që edhe Mogherini duhet të pendohej dhe të mendohej se pse këto vende nuk i plotësojnë dot këto kushte. Mos të harrojmë se në këto vendet e Ballkanit janë ngritur regjime, ku është kapur pushteti, nuk është kështu vetëm Shqipëria. Unë kam qenë dhe jam i idesë që nuk mund të përdoret hyrja e Shqipërisë si fasadë e Mogherinit në një krah, sepse po rriten forcat e djathta kudo.
Kjo është e gabuar. Shqipëria nuk meriton të hyjë në Europë, sepse ka shumë për të bërë. Nuk mund të legjitimohet e gjithë kjo politikë, e cila po i bën njerëzit të ikin. Ku janë sukseset? Unë nuk i shoh sukseset. Janë 60 për qind e shqiptarëve që po ikin dhe Mogherini nuk i sheh. Ajo thotë kemi bërë reformën në drejtësi, dhe nga ana tjetër kriminelët bëjnë dasmë në Kuvend. Realiteti nuk mbulohet. Unë mendoj që përtej asaj që mund të dua unë, nuk mbulohet dielli me shoshë”, deklaroi Lubonja.
