Kryeministri Rama ka mbajtur një konferencë për shtyp me Sekretarin e Përgjithshëm të NATO-s, Jens Stoltenberg. Gjatë fjalës së tij, Rama tha për mediat se fokusi i bisedës mes palëve kanë qenë negociatat, e mbi të gjitha ngërçi politik e mosgjetja e gjuhës së përbashkët me opozitën.
“Diskutuam edhe për negociatat, dhe për konfliktin politik. Vizita është afirmim i vëmendjes dhe kujdesit ndaj Shqipërisë”, u shpreh Rama.
Duke qendruar në të njëjtën linjë, Jens Stoltenberg ka apeluar që kriza politike të zgjidhet përmes dialogut. Shefi i NATO-s, Jens Stoltenberg, ka dënuar protestat e opozitës në Tiranë, dhe dhunën e ushtruar. Ai shprehet se janë të papranueshme shfaqjet e krijuara dhe minimi i institucioneve demokratike.
“Është kënaqësi e madhe që kthehem përsëri në Tiranë. Shqipëria ka qenë një anëtare shumë e vyer në NATO. Dua të shpreh mirënjohjen për dy ushtarakët trima, që humbën jetën muajin që shkoi.
Mendimet e mia dhe ngushëllimet më të thella shkojnë për familjet e tyre. Trupat tuaj kanë kontribuuar në luftën e KFOR-it në Kosovë, dhe në Afganistan. Kemi shpenzuar 51 milionë euro për projektet që do na ndihmojnë të jemi më efikas.
Shqipëria po jep shembullin e saj. KE ka rekomanduar për hapjen e negociatave për BE, dhe ne duam që ky proces të vijojë. Ne demokraci do ketë gjithmonë debate. Kjo nuk është dobësi, por dhuna bie ndesh me vlerat tona. I bëj thirrje aktorëve politikë, të sillen me vetëpërmbajtje për të vijuar në rrugën e integrimit, që problemet të zgjidhen përmes dialogut, për shkak se kjo kontribuon për të ardhmen e Shqipërisë”, tha Stoltenberg.
