Ish-kreu i Aleancës Kuq e Zi, Kreshnik Spahiu, i cili pak ditë më parë akuzoi presidentin Meta se i ka vjedhur simbolet e Aleancës Kuq e Zi, nëpërmjet një statusi në rrjetet sociale ka lëshuar një paralajmërim të fortë.
Spahiu paralajmëron se së shpejti do të vijë pranvera reale Kuqezi, e cila do të shpërndajë jo vetëm Presidencën, por edhe Qeverinë, Parlamentin e sistemin zgjedhor.
Dje presidenti Ilir Meta ktheu në Kuvend ligjin për “Statusin e gjyqtarëve dhe prokurorëve”, ndryshimet në të cilin, i heqin betimin e gjyqtarëve të Gjykatës së Lartë dhe të prokurorëve të SPAK. Në argumentet e tij, Meta i ka sulmuar ashpër këto dispozita.
Nga ana tjetër, Kryetari i Grupit Parlamentar të PS, Taulant Balla, teksa ka folur dje për mediat, ka dhënë sinjale se mazhoranca do të hartojë një ligj organik për Presidentin e Republikës, në mënyrë që të sanksionojë të drejtat dhe kompetencat e Kreut të Shtetit. Sipas Ballës, përmes këtij ligji, socialistët synojnë që t’i ndalojnë presidentit Meta aktivitetet politike.
“Ka ardhur koha, që jemi të vonuar, madje shumë të vonuar për të rregulluar funksionin edhe organizimin edhe të presidentit me një ligj, që siç e ka çdo vend, duhet të kemi dhe ne një ligj që duhet të parashikojë rastet kur Presidenti i Republikës merr foltoren dhe e përdor atë për një garë të brendshme me opozitën.
Kjo që po ndodh s’ka të bëjë aspak me një marrëdhënie normale të institucionit të Presidentit dhe Kuvendit, por me një garë të brendshme brenda opozitës, ku është çelur një sezon, një garë për lidershipin, pasi të mbarojë ky proces do dimë kush është kryetari i ri i opozitës”, deklaroi Balla.
