Ditën e sotme KPK shkarkoi nga detyra gjyqtaren Fatmira Hajdari ndërkohë së fundmi ka reaguar lidhur me këtë, e bija, deputetja Rudina Hajdari.
Gjatë fjalës së saj në Kuvend, ajo theksoi se beson tek Reforma në Drejtësi.
“Ata që mendonin se u futa në Kuvend për të mbrojtur time më, që më janë hedhur si ujqër sot e morën përgjigjen, unë besoj tek Reforma në Drejtësi sepse shkoj përtej interesave të familjes sime”, u shpreh Hajdari.
Kujtojmë se Fatmira Hajdari kishte probleme me justifikimin e pasurisë në vlerën e 60 milionë lekëve.
Problematik u konsiderua ndërtimi i një pallati 10-katësh në truallin e familjes pranë banesës së saj në Rrugën e Elbasanit në Tiranë, prej djalit të saj dhe një shoqërie private.
Sipas KPK, ndërtimi ishte pa leje dhe mbi një pjesë toke që nuk ishte pronë e tyre.
Në lidhje me kriterin e figurës, ajo vlerësohet e papërshtatshme me argumentin se nuk kishte deklaruar faktin se i ishte refuzuar viza për në Shtetet e Bashkuara të Amerikës.
