Komisioni i Pavarur i Kualifikimt ka bërë një bilanc dy vjeçar për të gjitha subjektet që janë rivlerësuar në sistemin gjyqësor. Sipas një raporti të bërë publik nga KPK-ja deri tani janë dhënë vendimet për 221 gjyqtarë dhe prokurorë.
Nga totali i vendimeve të dhëna vetëm 95, prokurorë, gjyqtarë dhe ndihmës ligjorë kanë arritur ta kalojnë me sukses vettingun. Nga ana tjetër, mbizotëron numri i të shkarkuarve dhe të tërhequrve. Mësohet 83 prej magjistratëve janë shkarkuar, 19 kanë dhënë dorëheqjen duke u vetpërjashtuar nga sistemi i drejtësisë për 15 vite.
Nga muaji shkurt i vitit 2018 deri në muajin dhjetor të vitit 2019, Komisioni ka marrë 221 vendime: 94 vendime për konfirmim në detyrë për subjektet e rivlerësimit; 83 vendime për shkarkim nga detyra për subjektet e rivlerësimit dhe 19 vendime për ndërprerje të procesit sipas nenit G, të Aneksit të Kushtetutës, pas dorëheqjes së subjektit të rivlerësimit. Është pushuar procesi i rivlerësimit për 8 subjekte, në bazë të nenit 56, të ligjit nr. 84/ 2016 (dorëheqje nga detyra brenda 3 muajve nga hyrja në fuqi e ligjit nr. 84/2016). Komisioni i Pavarur i Kualifikimit, bazuar në nenin 95 të Kodit të Procedurave Administrative, në ligjin nr. 96/2016 dhe në ligjin nr. 84/2016, ka përfunduar procesin e rivlerësimit pa një vendim përfundimtar për 16 subjekte rivlerësimi (15 prej të cilëve iu kishte mbaruar statusi i magjistratit për shkak të mbushjes së moshës për pension). Komisioni ka marrë vendim për pezullimin nga detyra për një periudhë 1-vjeçare për 1 subjekt rivlerësimi”, njofton KPK-ja.
