Sikundër në Shqipëri, edhe në Kosovë janë ashpërsuar masat, në lidhje me pandeminë që po shkakton bilance tragjike. Nga nesër do të aplikohen masa të reja. Një ndër këto masa lidhet me vendosjen e maskave.
Mbajtja e maskave do të jetë e detyrueshme në ambientet publike. Po kështu ndalohet dalja në rrugë e personave mbi 65 vjeç. Sipas ministrit të Shëndetësisë së Kosovës, Arben Vitia, masat e reja do të zgjasin deri në 4 maj.
“Këto masa që do të hyjnë të mërkurën në ora 6, të zbatohen në përpikmëri. Organet përgjegjëse do sigurohen për zbatimin e këtyre masave. Nëse bashkëpunojmë, mund të sigurohemi që këto masa të qëndrojnë në fuqi për kohën më të vogël të mundshme. Një masë më e vogël e bindjes e ndonjërit prej nesh mund të rrezikojë virusin në tërësi. Sa më shumë i respektojmë, do mund të kalojmë këtë periudhë.
Sidomos ditët e para do të jenë të vështira. Presim një sprovë të vështirë. Nuk guxojmë të tolerojmë as lëshimet më të vogla. Prej datës 15 prill 2020, në 06 të mëngjesit ndalohet qarkullimi i qytetarëve jashtë banesave. Për personat mbi moshën 16 vjeçare lejohet qarkullimi për furnizim me ushqime për familje, dhe pagesa bankare për jo më shumë se 1 orë e gjysmë. Gjatë qarkullimit nuk lejohet shoqërim nga asnjë person fizik, përveç në dy raste. Personat me aftësi të kufizuara dhe personat nën moshën 16 vjeç, në prani të kujdestarit”, tha ndër të tjera Vitia.
