Në Kosovë është konfirmuar rasti i parë me varintin afrikan. Lajmin e ka përcjellë Instituti Kombëtar i Shëndetit Publik, ku ka njoftuar se është konfirmuar një rast me variantin afrikan të COVID-19 në Kosovë.
Pacienti po trajtohet në Klinikën Infektive. Në njoftimin për media thuhet se rastet e tilla të virusit mutagjen, janë regjistruar në shumë vende të botës.
Ekipet hulumtuese të IKSHPK po gjurmojnë të gjitha burimet e mundshme, për të parandaluar përhapjen e mëtejshme të rasteve.
Njoftimi i plotë:
Në laboratoret e Mikrobiologjisë të IKSHPK, në baza ditore testohen mesatarisht mijëra mostra në ditë. Nga mostrat e testuara në SARS-CoV-2, është konfirmuar edhe një rast me variantin afrikan të SARS CoV-2: South Africa (S.A) Lineage B.11351 (N501Y) (ËHO label: Beta).
Pacienti është i hospitalizuar dhe duke u trajtuar në Klinikën Infektive. Duke qenë se tashmë rasti është kontaktuar, do të hulumtohen kontaktet për identifikimin eventual të rasteve të reja.
Rastet e tilla të virusit mutagjen janë regjistruar tashmë në shumë vende të botës. Ekipet hulumtuese të IKSHPK po gjurmojnë pandërprerë të gjitha burimet e mundshme për të parandaluar përhapjen e mëtutjeshme të rasteve dhe implikimet e mundshme në shëndetin e njeriut.
Masat parandaluese janë të njëjta. Personat të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet.
Me zvogëlimin e kontakteve, do të mundësohet ndërprerja e përhapjes së infeksionit. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës.
