Një ngjarje e rëndë ka ndodhur në një qendër votimi në Pejë të Kosovës, ku një 68-vjeçar është gjendur i shtrirë përtokë jashtë ambientit të shkollës “Xhamil Kada”.
Media kosovare raportojnë se i moshuari është dërguar menjëherë në spital por ka mbërritur pa shenja jete.
Ndërkohë, ka ardhur edhe reagimi i policisë së Pejës, e cila është shprehur se personi ka pasur probleme shëndetësore dhe është dërguar menjëherë në spitalin rajonal.
“Kemi informata se një person ka pasur probleme shëndetësore dhe i njëjti është dërguar në Spitalin Rajonal po momentalisht nuk kemi ndonjë informacion”, tha zëdhënësi i Policisë në Pejë, Driton Rugova.
Lajmin për vdekjen e të moshuarit e konfirmoi për median kosovare, ‘Express’, drejtori i spitalit, Skënder Dreshaj.
“Një person para pak minutave është sjellë në Spitalin e Pejës pa shenja jete”, tha drejtori i spitalit të Pejës.
