Me anë të një seance të jashtëzakonshme, Kuvendi i Kosovës pritet të shpërndajë legjislaturën aktuale, gjë e cila do t’i hapë rrugë zgjedhjeve të parakohshme.
Seanca vjen pasi subjektet politike janë shprehur publikisht pro qëndrimit për zgjedhje të parakohshme, pas dorëheqjes së kryeministrit Ramush Haradinaj, për shkak të ftesës nga Gjykata Speciale.
Propozimi i deputetëve për shpërndarjen e Kuvendit, pason dorëheqjen e Ramush Haradinajt nga posti i kryeministrit të Kosovës më 19 korrik, pasi kishte marrë ftesë nga Gjykata Speciale e Kosovës me seli në Hagë, për t’u intervistuar në cilësinë e të dyshuarit për krime lufte.
Gjatë seancës, do të duhet të votojnë 2/3 e deputetëve, ose 80 vota. Seanca e sotme u thirr dhe u kërkua nga 93 deputetë në total. Nëse deputetët do të votojnë dhe Kuvendi do të shpërndahet, pritet që presidenti i Kosovës, Hashim Thaçi, më pas të caktojë edhe datën e zgjedhjeve të parakohshme parlamentare.
