Kreu i Kuvendit të Kosovës Kadri Veseli i është kundërpërgjigjur paralajmërimit të Presidentit turk Rexhep Taip Erdogan drejtuar Kryeministrit Ramush Haradinaj. Përmes një postimi në Facebook, Veseli i quan shqetësuese deklaratat që vijnë nga lideri i një vendi mik si Turqia.
Sipas Veselit, veprimet e institucioneve të Republikës së Kosovës janë sovrane dhe nuk mund t’u nënshtrohen presioneve të jashtme. Në një intervistë për mediat kosovare kryeparlamentari paralajmëroi shkarkimin e të tjerë zyrtarëve përgjegjës për ekstradimin e fshehtë.
“Më vjen keq që nuk ka zyrtar nga partia ime se e kisha shkarkuar për dy minuta. Do të shkarkohet çdokush ka përgjegjësi”.
Por Ministria e Jashtme turke lëshoi një deklaratë për shtyp, ku i kërkohet autoriteteve kosovare të garantojnë sigurinë e ambasadës turke në Prishtinë. Ambasada turke hedh akuza se prapa protestave të ditëve të fundit dhe reagimeve kundër ekstradimit të 6 gylenistëve drejt Turqisë, fshihet rrjeti i klerikut në arrati Fetullah Gylen. Kriza në marrdhëniet me Turqinë u përmend edhe në meshën e mesnatës të Pashkëve në Prishtinë nga Imzot Dodë Gjergji, i cili ekstradimin e turqve, e quajti prerje në besë.
“Këta që kanë prerë mikun në besë dje, do të jenë nesër të gatshëm të dorëzojnë edhe kryeministrin”.
Të enjten, 6 shtetas turq pjesë e rrjetit të institucioneve arsimore të Fetullah Gylenit u arrestuan dhe u ekstraduan fshehurazi drejt Turqisë. Presidenti turk tha se operacioni ishte kryer në mënyrë të fshehtë si bashkëpunim mes shërbimeve sekrete të dy vendeve.
