Ish-kryeministri i Kosovës, Ramush Haradinaj, ka dhënë vlerësimin e tij në lidhje me intervistimin në Hagë të Hashim Thaçit, pas aktakuzës për krime lufte.
Në një intervistë për Çim Peka LIVE, ai tha se është një situatë e vështirë dhe se Kosova rrezikon të dëmtohet rëndë. “Është një situatë e vështirë për Kosovën, pasi akuzat ndaj UÇK-së e kanë burimin e parë në Beograd dhe Serbi.
Nëse ndodh konfirmimi i ndonjë vepre, Kosova rrezikon të dëmtohet rëndë.
Kosova duhet të bëjë kujdes, të gjithë shqiptarët duhet të bëjnë kujdes, që Kosova të mbetet e pastër në fund të procesit”, tha ai.
I pyetur se si e komenton ai faktin që Thaçi po implikon në këtë histori të gjithë UÇK-në dhe Kosovën, Haradinaj tha: “Akuzat iu drejtohen individëve konkretë, por veprat i vijnë vetvetiu Kosovës e shqiptarëve. Pa deshtë me mbrojtë Thaçin ose Veselin, nëse konfirmohet se janë kryer vepra, llogaria e keqe u vjen shqiptarëve dhe Kosovës,” tha Haradinaj.
Presidenti Thaçi do të vazhdojë dëshminë e tij nesër në Hagë, por nuk është e qartë se kur do të përfundojë.
Publikimi i akuzave muajin e kaluar, nxiti reagime në shkallë të gjerë dhe kritika ndaj prokurorisë, veprimi i së cilës u cilësua nga vëzhgues në Kosovë si politikisht i motivuar.
Njoftimi për akuzat bëri që të anulohet edhe një takim Kosovë – Serbi në Shtëpinë e Bardhë që pritej të mbahej më 27 qershor, me ndërmjetësimin e ambasadorit amerikan Richard Grenell.
