Kryeministri ende në detyrë i Kosovës, Ramush Haradinaj, ka përshëndetur hyrjen e 337 ushtarëve të rinj në FSK, teksa shton se vendi ka ushtrinë më të re sipas modelit të NATO-s.
Përmes një postimi në Facebook, Haradinaj shprehet se ushtria e re e Kosovës është e përkushtuar për sigurinë në vend, stabilitetin në rajon dhe të gatshme për operacione paqeruajtëse kudo në botë, kurdo që kërkohet nga aleatët strategjikë si ShBA dhe strukturat e paktit Veri-Atlantik.
“Sot në rreshtin e paqes të Ushtrisë së Kosovës, kanë hyrë 337 ushtarë të rinj, pas mbarimit me sukses të trajnimit themelor në Komandën e Doktrinës dhe Stërvitjes. Kosova ka ushtrinë më të re sipas modelit të NATO-s, të përkushtuar për sigurinë në vend, stabilitetin në rajon dhe të gatshme për operacione paqeruajtëse kudo në botë, kurdo që kërkohet nga aleatët tanë strategjik, ShBA dhe strukturat e paktit Veri-Atlantik. Ushtarët e Kosovës gjithmonë me nder në shërbim të paqes, për të sotmen dhe të ardhmen e sigurt”, shkruan ai.
