I emëruari i SHBA për dialogun Kosovë-Serbi, Richard Grenell, ka njoftuar se qeveritë respektive do të takohen më 27 qershor në Washington. Lidhur me këtë lajm, një reagim i menjëhershëm ka ardhur nga presidenti i Kosovës, Hashim Thaçi.
Ai ka përshëndetur rifillimin e dialogut. Me një status në Facebook, Thaçi thekson se Kosova është e gatshme për të arritur marrëveshje historike paqësore me Serbinë, njohje reciproke dhe vendosje të marrëdhënieve diplomatike. E sipas tij, tashmë i takon institucioneve të Republikës së Kosovës, që të tregojnë mençuri dhe maturi në ndërtimin e unitetit dhe koordinimit me partnerët strategjikë, për të përmbyllur këtë proces.
Statusi
Udhëheqja e proceseve të mëdha politike nga Shtetet e Bashkuara të Amerikës ka qenë gjithmonë përcaktuese për Republikën e Kosovës dhe popullin e saj.
Si President i Republikës së Kosovës e mirëpres ftesën për ta rifilluar procesin e dialogut për normalizimin e marrëdhënieve ndërmjet Kosovës dhe Serbisë nën udhëheqjen e Presidentit të Shteteve të Bashkuara të Amerikës, Donald Trump, si dhe të dërguarit special të tij ambasadorit Richard Grenell.
Kosova është e gatshme për të arritur marrëveshje historike paqësore me Serbinë, njohje reciproke dhe vendosje të marrëdhënieve diplomatike.
Tani i takon institucioneve të Republikës së Kosovës që të tregojnë mençuri dhe maturi në ndërtimin e unitetit dhe koordinimit me partnerët tanë strategjikë dhe të përkushtohemi që ta përmbyllim me sukses këtë proces. HTH
