Kreu i Urgjencës Kombëtare, Skënder Brataj ddeklaroi se këtë verë mund të mos jemi të detyruar për të mbajtur maskën, të paktën në ambientet e hapura.
Në një intervistë për “Report TV”, Brataj tha se situata epidemiologjike është drejt përmirësimit, teksa shtoi se masat duhet të lirohen në mënyrë graduale që të mos ketë kthim mbrapa.
Ndër të tjera, Brataj u shpreh se deri më tani janë siguruar 2.6 milion vaksina, dhe po vazhdojnë negociata për të marrë sasi të tjera.
Skënder Brataj: “Predispozicioni është i mirë që do shkojmë drejt lirimit të masave, vera na ndihmon. Jemi drejt vlerësimit të lirimit të masave për një sezon turistik sa më të mirë. Nuk më shqetëson vera sepse situata do të jetë më e lehtë. Masat duhet të lirohen në mënyrë graduale që të mos ketë kthim mbrapa. Vetëm me indikatorët do të vlerësohet situata me pandeminë në Shqipëri.
Negociatat për sigurimin e vaksinave nuk kanë përfunduar asnjëherë. 2 milion e 600 mijë vaksina janë të kontraktuara tashmë. Jemi në një pikë shumë të mirë, vaksinimi masiv do vijojë dhe në verë. Sezoni turistik do të jetë i qetë, do organizohemi me shtim të qendrave shëndetësore verore, do merren masat. Verë me vaksina, me masa, por mendoj pa maska, të paktën në ambientet jashtë. Siç është ecuria besoj pa maska.”
Kurba e koronavirusit në vend mbetet në nivele të ulëta pasi 24 orët e fundit janë regjistruar 92 raste të reja, nga 2.851 testime të kryera.
Ndërkohë, edhe procesi i vaksinimit masiv të popullsisë po ecën me ritme të kënaqshme, teksa aktualisht janë vaksinuar mbi 537 mijë qytetarë.
