Greqia ka shënuar ditën e sotme 94 raste të reja me koronavirus, duke e çuar në 624 numrin total të të infektuarve.
Specialisti i sëmundjeve infektive, Tsiodras bën gjithashtu me dije se numri i viktimave është rritur. Deri më tani në Greqi shënohen 15 viktima: 12 burra dhe 3 gra.
Mediat greke raportojnë se 14 prej viktimave vuanin nga sëmundje të tjera të rënda, duke bërë që Covid-19 t’ua rëndonte gjendjen shëndetësore.
Shumica e personave të prekur rezultojnë të jenë nga Athina. Në spital ndodhen 124 pacientë të shtruar, 34 prej të cilëve janë intubuar.
Pacientët e shtruar në spital vuajnë edhe nga sëmundje të tjera. Mosha mesatare e tyre llogaritet nga 64 deri në 67 vjeç.
Deri më tani vetëm 19 persona kanë arritur të shërohen nga koronavirusi në shtetin fqinj.
